Prie
Celoj kaj principoj
La Nitobe-centro por lingva demokratio klopodas altigi la nivelon kaj intensecon de la prilingvaj debatoj publikaj kaj politikaj en la kuniĝanta Eŭropo, cele al la evoluigo de komuna, konstruema, realisma lingvopolitika kadro, kiu ekvilibrigu protektadon kaj aprezadon de lingva diverseco kun la bezono de efika, altkvalita komunikado inter ĉiuj civitanoj en EU.
La inspiro por la Centro venis el konferenca serio (la Nitobe-simpozioj) en la jaroj 1996-2005, organizita de la Centro por Esploro kaj Dokumentado pri la Monda Lingvo-Problemo. Tiuj konferencoj kunvenigis aktivulojn, akademiulojn, ŝtatoficistojn kaj politikistojn por pritrakti la lingvajn dimensiojn de eŭropa integriĝo kaj tutmondiĝo. La kvara Simpozio (30 julio - 1 augusto, 2005, en Vilno, Litovio) atentigis precipe pri la bezono de pli vasta kaj bone informita diskutado pri la politikaj aspektoj de lingvo kaj komunikado en ĉiuj ŝtatoj-membroj de EU.
Konkretaj celoj
La Centro subtenas agadojn por jenaj celoj, difinitaj en la kvara Nitobe-simpozio:
- ellabori, kun la partopreno de plej diversaj individuoj kaj institucioj, komunan lingvopolitikan kadron por Eŭropa Unio, en kiu la lingva diverseco kunekzistu kun efika, altkvalita komunikado je civitana nivelo;
- stimuli publikajn kaj politikajn debatojn pri tia lingvopolitiko, kaj subteni ilin per ellaboro kaj provizo de fidindaj informoj;
- atenti, en la lingvopolitikaj debatoj, la specifecon de solvoj por diversaj aspektoj de EU:
- profesia komunikado inter EU-oficistoj;
- oficiala komunikado de EU-institucioj kun civitanoj kaj registaroj;
- ŝtataj leĝoj kaj lingvopolitiko ene de la membroj de EU;
- komunikado kaj lingvopolitiko en la publika sfero;
- ekstera komunikado de EU kun ne-eŭropaj ŝtatoj kaj internaciaj organizaĵoj;
- plivastigi la gamon de alternativaj vizioj kaj lingvopolitikaj proponoj, inkluzive de:
- analizoj de diversaj modeloj de multlingvismo tra la mondo;
- strategioj por defendi malgrandajn lingvojn kaj lingvokomunumojn;
- rimedoj por limigi la konsekvencojn de disvastiĝo de unu granda interlingvo;
- esploroj pri la potenciala rolo de Esperanto en komuna lingvopolitiko de EU;
- prognozoj pri la estonta disvolviĝo de lingva kaj komunika teknologio, kaj de novaj sistemoj de fremdlingva edukado;
- kunlaborigi homojn el la akademiaj, burokrataj, politikaj, aktivulaj, kaj ĵurnalistaj medioj de la EU-ŝtatoj, por la evoluigo de komunaj solvoj al komunaj lingvaj problemoj.
La Nitobe-centro kunigas plurlingvan retpaĝan teknologion kun tuteŭropa volontula reto por faciligi la interŝanĝon de ideoj, informoj, kaj iniciatoj pri larĝa gamo de temoj rilataj al lingva diverseco kaj komunikado. Laŭeble, per siaj limigitaj rimedoj, la Centro provas realigi modelon de efika interlingva kunlaboro. Ĝi bonvenigas kontribuojn en ĉiuj eŭropaj lingvoj, oficialaj kaj neoficialaj, kaj traduke peras ilin al alilingvanoj. Multaj internaciaj agadoj estas planataj kaj kunordigataj per la neŭtrala lingvo Esperanto.
La fondon de la Centro financis la usona esplorfonduso Esperantic Studies Foundation. Ni bonvenigas kontaktojn kun eventualaj partneroj kaj kunfinancantoj.