Por E-istoj
Por E-istoj - Pri celoj
La celoj de la E-movado estas multaj kaj malsamaj ĉe diversaj organizoj kaj E-istoj. Kelkaj el ili estas ke Esperanto fariĝu:
- ĉies dua lingvo en EU (kaj poste en la tuta mondo)
- laborlingvo de EU
- relajsa lingvo en la parlamento de EU
Sed kiom realismaj estas tiuj celoj se ni pensas pri la venontaj 10-30 jaroj? Verŝajne ne tre, pro pluraj kialoj...
La supraj celoj bonas kiel tre longdaŭraj celoj, sed gravas havi ankaŭ celojn iom malpli longdaŭrajn. Jen provo listigi kaj priskribi tiajn.
Celo 1: "Nitobe-raporto por EU"
Ideo de Detlev Blanke:
"Se oni ne postulas la enkondukon de Esperanto postmorgaŭ en la Unio, sed
multe pli modeste, ke la Unio almenaŭ pretu informiĝi, tio eble havus pli
da ŝanco. Preni politikan decidon surbaze de certaj informoj jam estas
tute alia afero."
(El la dokumento Ĉu Nitobe-raporton por Eŭropa Unio?)
Tempodiveno: ĝis 2010
Celo 2: "Oficiala agnosko"
La parlamento aŭ la komisiono de EU oficiale agnoskas ke Eo
estas lingvo taŭga por internacia komunikado.
Tempodiveno: ĝis 2015
Celo 3: "Morala kaj financa subteno"
Starigo de fondaĵo kadre de EU kies ĉefa celo estas subteni agadon kiu iel rilatas al Eo.
Tempodiveno: ĝis 2020
Celo 4: "Esplor- kaj eduk-centroj"
Starigo de centroj de EU kiu okupiĝas pri esplorado kaj edukado rilate al Eo.
Tempodiveno: ĝis 2025
Celo 5: "Rekomendoj"
EU oficiale rekomendas al siaj ŝtatoj-membroj diversmaniere subteni Eon.
Tempodiveno: ĝis 2030